A historia do percorrido da festa da lamprea entre 1961 e o 2010, cincuenta anos de vida a través de catro décadas do século XX e unha do século XXI, procura en primeiro lugar rememorar e recoñecer o traballo feito en cada etapa por alcaldes, tenentes de alcalde, concelleiros e funcionarios das diferentes corporacións municipais; polos presidentes, secretarios e vocais dos Comités Activos e integrantes dos Comités de Honor, polas posteriores comisións de festas; polas cociñeiras e polos agricultores que colleitan o viño e os pescadores que traen o peixe; por hostaleiros, asociacións veciñais, culturais e deportivas; e por todos os demais implicados, con especial mención aos pioneiros, pensadores da idea e creadores do “Día da Lamprea”, que desde a edición inicial albiscaron na gastronomía un feito de relevancia socioeconómica, política e cultural. A súa estima merecen igualmente os medios de comunicación, de maneira fundamental a prensa escrita, que desde o primeiro día comentaron os feitos máis relevantes. Enviados especiais e xornalistas (Cesáreo Sáenz Uriondo, González-Martín, Martínez Salgado, Rodrigo Varela, Luz María Durán, José Rey, Amalia Gallego, Gabino Porto, Guillerme Rodríguez,…), fotógrafos (Tomás, Antonio Gabriel, Magar, Cameselle, Llanos, Carlos Rodríguez, Freire, A. Fernández,…) e prestixiosas firmas ( Álvaro Cunqueiro, J. María Castroviejo, Eliseo Alonso, Alfonso Vázquez,…) plasmaron nas páxinas de Faro de Vigo, El Pueblo Gallego, La Voz de Galicia, A Peneira e outros medios, a crónica da festa e contribuíron a consolidar e estender a súa importancia e popularidade.

O Libro-homenaxe á Festa da lamprea.1961-2010 pretende ser, tal como a “Comida-homenaxe do Primeiro Día da Lamprea”, un banquete motivador e xeneroso que amose o orgullo dun pobo cara aos sinais de identidade que o localizan no mundo: a lamprea e os viños, festexados en perfecta harmonía. Pero tamén ansía contribuír a engrandecer a historia cultural existente acerca da vida e costumes do rechamante petromyzon. Coa mesma ilusión e expectativa coas que se presentaron e degustaron os diferentes pratos do “Menú 61”, este percorrido a nado río arriba por cincuenta lampreadas agarda ofrecer un conxunto de sabores e arrecendos atractivos, tanto aos veciños arbenses coma aos cada vez máis numerosos visitantes e siareiros, de procedencia xeográfica moi diversa. Na actualidade, e sobre todo no favorable progreso socioeconómico das últimas décadas, na era da información que converteu o mundo nunha aldea global, milleiros de persoas renden tributo e dan vida á Festa da lamprea coa súa presenza nos restaurantes da vila e na Gran Tasca Popular situada no Arbomostra, lugar de conciliación do xantar tradicional e os renovados e prestixiosos albariños e condados das Adegas con Denominación de Orixe. A Arbomostra debería ser a zona cero onde se mesturen os vellos e os novos tempos, o punto de encontro idóneo para pensar no futuro e reivindicar a defensa do río Miño, do Deva e o Cea, e poñer en valor as moi diversas potencialidades agrícolas das fértiles terras de Santa María de Arbo, San Sebastián de Cabeiras, San Xoán de Barcela, Santa Mariña de Sela, San Cristovo de Mourentán e San Miguel de Cequeliños, antigas freguesías de atraente patrimonio natural e histórico localizadas no estratéxico marco transfronteirizo de Galicia e Portugal.